Jong Holland ta bolbe empatá i Cuba tambe ta empatá

189
WILLEMSTAD – E último weganan simultanio ku tabata programa pa ayera 8’or anochi pa loke ta e torneo Caribbean Club Shield 2019 a bai entre e ekipo di Scholars International Sports Club (Cayman Islands) i e ekipo Santiago de Cuba (Cuba), wega ku a hunga den Stadion Antoine Maduro.

Den e otro enkuentro ku a tuma luga den SDK tabata  ekipo di Korsou, Jong Holland, ku a enfrenta e ekipo Fruta Conquerors di Guyana. Pa loke ta e enkuetro entre Jong Holland i Fruta Conqueros, mester remarka ku tabata un wega poko bou di nivel ku ambos ekipo basta eratiko i uzando hopi forsa fisiko riba tereno di wega ku a deslusi e wega. E arbitro Moeth Gaymes tabatin basta trabou den e enkuentro aki pa mantene e kosnan bou di kontrol. Despues di sigur un enkuentro basta sofoka esakio ta bai sosega ku e markado en blanko. Den e di dos mitar e ekipo di Jong Holland ta riska muchu mas tantu i na algun okashon tabata e hungado Leuteria ku a bira mas peligroso pero no ta logra e definishon final ku eksito. Sigur un enkuentro ku e ekipo di Jong Holland a haña diferente oportunidat di anota pero ta keda kortiku i di e forma aki ta logra otro empate na sero i ta akumula 2 punto. Awor nan lo tin di enfrenta Scholars International Sports Club (Cayman Islands) ku tin 4 punto. Pa loke ta e enkuentro ku a tuma luga den Stadion Antoine Maduro entre Scholars International Sports Club (Cayman Islands) i e ekipo Santiago de Cuba (Cuba), esaki a keda dirigi pa e refri William Anderson. E enkuentro aki a kuminsa basta pareu ku ambos ekipo tratando na anota prome. Ambos ekipo a lucha tenasmente pero sin logra e kos mas importante ku ta e gol i e enkuntro ta bin finalisa den un empate na sero.