Westpunt—Gobièrnu di Kòrsou, lo pèrdè por lo ménos 16 mion florin, na momento Kura Hulanda Lodge bai vindishi i  wòrdu bendí. Tur plaka ku gobièrnu a fia e hotèl via di su fundashon Stichting Economische Ontwikkeling, lo bai pa Korpodeko.

E 16 mion florin ta forma parti di un bolsa aktivá di 90 mion florin (sin kita provishon i balor nominal di fiansanan) ku a bai pa Korpodeko despues ku gobièrnu a laga destituí SEO. SEO, a manda tur aktivo i kèsh ku tabata korespondé na Kòrsou pa Korpodeko. Na 2017, SEO a manda 20.5 mion florin pa Korpodeko i ta paga St. Maarten tambe 8 mion florin komo parti di nan bolsa den e fundashon. BES te ainda no a risibí niun pago. Aparte di a duna Korpodeko 20.5 mion florin, SEO a sede dos fiansa mionario na Korpodeko sin kontra pago.

Splika: si supervishon bini, Rhuggenaath tin hopi di splika.

51 mion florin (balor nominal) riba nòmber di e proyekto hotelero Santa Barbara i un fiansa mas di 16 mion riba nòmber di Kura Ulanda (Lodge). Tin destiná tambe 2.8 mion kèsh mas pa Korpodeko, miéntras a tuma un provishon di 1 mion florin pa finalisá e proseso di likidashon i destitushon. E total, un suma aktivá di 91 mion florin a bai pa Korpodeko. Tur e plaka aki ta korespondé na subi kuenta general di Kòrsou. Si e desishon lo a tuma lugá, awe kabinete Rhuggenaath lo no ta den niun problema ku supervishon na kaminda. St. Maarten na 2017 a tuma su sen di SEO i depositá esaki mesora riba nan kuenta general.

SEO ta un fundashon instituí na 2002, despues ku Kòrsou tabata bai pèrdè kasi 100 mion florin na plaka di desaroyo fo’i Ulanda. Gobièrnu di 2002, bou di minister Suzy Camelia Romer, e tempu ei a lanta e fundashon. Atraves di aña e fundashon a hasi fiansa i partisipashon den diferente proyekto. E fundashon tabatin un Hunta di Maneho (Bestür) i Hunta di Supervishon. Na momentu a destituí e fundashon, su aktivo tabata konsistí di 75 mion na fiansa (sin provishon) i 27 mion na kèsh. Na febrüari 2019, a inisiá e proseso pa likidá e fundashon pero fo’i 2015 a kuminsá e proseso pa re-alokashon di su fondonan na e grupo di interes. Gobièrnu for di 2010 te ku 2018 a laga tuma diferente konseho unda e fondonan mester bai. Riba e repartishon, reglanan no sientífiko, den kuadro di Corporate Governance a hunga un ròl, unda mester a konsulta ku dekretonan i statutonan di e fundashon. Den e seri di konsehonan aki, tin 2 ofisina di abogado kende a konkluí ku e plaka mester bai bek pa Kòrsou, despues ku tene kuenta ku reglanan i proseduranan den repartishon di bolsa despues di 2010. Ningun di e dos konsehonan no a menshoná Korpodeko. Korpodeko, a bin kai despues den e repartishon, despues ku miembronan di bestür a tuma otro konseho basá riba statutonan di e fundashon.

16 mion: despues di a pone 16 mion florin aden, gobièrnu lo keda sin nada. Korpodeko lo risibí tur plaka fo’i benta di Kura Hulanda Lodge na Westpunt.

Segun HBN Law, e aktivonan di e fundashon ta prosedente fo’i presupuesto di Antia Ulandes i mester bai den e bolsa di repartishon unda kada isla lo haña nan parti. SMS Advocaten ta pensa otro i nan a konsehá pa Kòrsou tuma hinter e bolsa di aktivo di SEO, despues di konsulta ku Hunta di Minister i adaptashon di Statüt. Den ningun dje konsehonan, no a menshoná Korpodeko komo benifesiario di e fondonan públiko di SEO. Te na 2014, e úniko benifesiario di SEO i nan aktivo di 90 mion florin, tabata gobièrnu di Kòrsou, St. Maarten i BES. Na 2017, bestür di SEO, bou di un kambio di konseheronan, a kuminsá repartí e bolsa.  St. Maarten manera menshoná, korektamente a tuma su sèn i mesora drecha su kuenta general pa kita Cft foi su lomba. Pero na Kòrsou, ministernan Rhuggenaath i Martina a disidí otro. En bes di laga SEO, re-aloká e sèn den kaha di gobièrnu (konforme konsehonan di HBN Law i SMS Advocaten) , nan a manda e sèn pa Korpodeko. Konsekuentemente, 90 mion na aktivo (sin provishon) awor ta riba aktivo di Korpodeko i aki algun siman Hunta di Minister di Reino lo imponé mas medida ekonómiko riba pueblo di Kòrsou pa falta di un desishon deskabeyá i sin konosementu.