Cristiano Ronaldo lo hunga awe kontra di Ajax den Champions League

113
Fot cristiano: E la práktika normalmente ayera mainta na Turin ku Vieccha Signora i pa mèrdia e subi avion ku e plantel. Ta trata di Cristiano Ronaldo.

AMSTERDAM,  – E portugues finalmente lo bai hunga kontra di Ajax. Segun notisia ku a keda publiká pa medionan italiano e plantel di Juve a kore kontra di oloshi pa asina  rekuperá piesanan klave pa loke ta plantel di e entrenadó  Maximiliano Allegri.

Prioridat? Opviamente tabata pa konta ku e atakante dje ekipo Bianconeri. Y finalmente CR-7 lo enfrentá e ekipo hulandes.  Pero den alegria aki a nanse dos desepshon. Chiellini i Emre Can tin chèns di keda afó awe pa motibu di leshon.

Cristiano Ronaldo a rekuperá di su leshon. E  7 a partisipá den e sekshon di entrenamentu hariendo i preparando un 100% pa e partido kontra di Ajax. Allegri lo konvoka aunke su presensia den e plantel  titular ainda mester keda konfirmá.

E internashonal portugues a sigurá den un entrevista despues di e partido entre Portugal i Serbia di kua a kaba un empate 1-1, ku e leshon muskular ku e la sufri na minüt  29 dje partido ora ku e tabata kore riba liña ku un bala no ta prokup’é masha.
“Mi no ta prekupá ku esaki, mi konosé mi kurpa. Esun ku ta kana den áwaseru por muha”, asina  Ronaldo a duna di konosé den deklarashonnan  hasi na periodistanan.

Ronaldo a leshoná den un kareda solitario na minüt   28. Rápidamente a nota ku e la haña un “spierscheuring” i pone man patras di su pia, miéntras ku e la keda na suela sperando yudansa.

Tabatin  rumor ku kasi sigur e lo pèrdè e partido di Ida di kuartfinal  Champions League kontra di Ajax na Amsterdam, porsierto plantel ku a eliminá  Real Madrid den oktavo final. Pero manera nos a publiká ariba tur esaki ta tras di lomba.

Enkambio esunnan ku no ta sigur di lo yega ta  Chiellini Emre Can. Ámbos a hasi trabounan spesífiko den gimnasio. E sentral ta sufri un problema na su ènkel i parse e ta deskartá pa e partido di kuartfinal den Champions League.  Un ousensia  ku lo por ta klave pa e duelo di awe den Amsterdam Arena.

Si e no logra regresá, Rugani, huntu ku Bonucci ta perfila pa ta e pareha den defensa. Emre Can tabatin un leshon na su ènkel di kua e la sufri kontra di Milan i a konfirmá ku ainda e ta sinti doló.

Juventus djamars mèrdia a sali di Turin pa Amsterdam na unda awe lo keda konvoka e lista di hungadónan.  E chèns ta hopi grandi ku  Chiellini Emre Can lo kai for di e lista awe aki, aunke mester warda te na último momentu.