OM ta pidi kastigu pa agentenan detenshon Henriquez

195
awor sí OM a mira relashon entre violensia polisial i morto Henriquez
DEN HAAG—Awor si Ministerio Públiko a pidi kastigu pa e dos agentenan envolví den e detenshon fatal di Mitch Henriquez.

Kontrali na e kaso den prome instansia OM ta mira awor un relashon kasual entre e violensia di agentenan i e morto di Henriquez, ku a tuma lugá 4 aña pasa na Den Haag. E demanda kontra e agentenan ta un kastigu kondishonal di 6 luna i tambe OM a pidi un prohibishon di trabou di polis pa dos aña. E demanda di 6 luna kondishonal ta igual na e veredikto di korte fin di 2017, pero e tempu ei OM a pidi konfeshon sin kastigu. OM a basa su mes riba inklaridat di e kousa di morto. Henriquez (42) a keda detené den yüni 2015 na un festival di musika na Den Haag, pasobra el a ripiti ku e tabatin un arma kandela. Henriquez a resistí detenshon i agentenan a usa violensia fuerte, inkluso tene na garganta. Un dia despues Henriquez a bin fayesé. Ekspertonan no por a yega na akuerdo si e morto tabata relashonaá ku e ‘nekklem’, pero e relashon aki awor si a keda demostrá segun OM. OM ta basa su mes riba un rapòrt nobo di Forensisch Medisch Genootschap. Segun abogado general di OM agentenan a surpasá limitenan di violensia i ta kulpabel di maltrato ku morto komo konsekuensia. Abogado general a konsiderá pa pidi un kastigu inkondishonal mirando e konsekuensia fatal i e impakto  grandi di echosnan. A base di kasonan anterior kaminda a persigui agentenan, e demanda a kambia. Awe defense ta na palabra. E veredikto ta 19 yüni.