Jong Holland bon motivá i kla pa triunfo awe

Ta konta ku bo sosten i apoyo masal !!!

65
Jursley ‘Pipo’ Kroonstad (25), kende awe lo no por ta den akshon pa Jong Holland.
WILLEMSTAD—E ekipo trikolor di Jong Holland ta kla i bon motivá pa e wega di awe. Esaki bálido pa kuartfinal di e torneo Concacaf, unda nan lo topa e kampion di Guadaloupe awe nochi 8’or na SDK.

Deporte Vigilante tabata den kontakto ku diferente miembro di e organisashon, unda entre otro e tékniko Lennox Mauris a splika ku nan ta kla pa nada otro, ku un triunfo awe nochi.

“Mi ta hopi orguyoso di loke e muchanan a presta i e esfuerso ku nan ta hasiendo. Esaki apesar ku ta algu hopi duru, unda bo ta hungando weganan fuerte di nivel haltu kada bula dia. Tin algun kos chikí pa drecha pero mi ta konforme. Pa awe nos lo no tin ‘Djodjo’ Winklaar atrobe, kende nos a manda kas pa motibunan disiplinario. ‘Pipo’ Kroonstadt no por hunga, pa motibu di karchi. Miéntras ku ‘Fèfè’ Zimmerman ta malu i no por hunga bala. Durante di dia nos lo mira kon Gaviria lo sigui. Pero nos ta kla i bon motivá pa otro viktoria i asina sigui den e torneo, sakando kara di Kòrsou”.

Pues motibu sigur pa e ekipo lokal, konta awe nochi, ku apoyo, animashon i sosten masal di nos pueblo.