Venezuela ta sufri pèrdida di koriente nashonal

99
Venezuela un biaha mas tabata den sukú.

CARACAS – Vários region di Venezuela ta mantené nan mes sin elektrisidat for di oranan di djamars anochi despues di un pèrdida di koriente ku a afektá kasi henter e pais, inkluyendo Caracas. Esaki mei mei di un plan di rashonamentu di energia ku kua gobièrnu ta kòrta koriente al ménos 18 ora durante siman na miónes di siudadanonan.

Na Caracas, e fluido eléktriko a keda interumpí dos biaha durante oranan di mardugá di ayera, praktikamente na henter e kapital el a keda rekonektá bèk. E servisio di metro, ku ta keda usá diariamente pa vários shen mil persona, a keda habrí aunke tin algun retraso.

Miéntras tantu, e estado di Trujillo, Falcon, Carabobo i na frontera ku Colombia, Zulia i Tachira, ta sigui ainda sukú.

Medionan di komunikashon di e pais i tambe dirigentenan opositor ta sostené ku 20 di e 23 estadonan di e pais petrolero a keda afektá pa e pèrdida di koriente i ku mayoria di e teritorionan ta ainda sin energia, te ku oranan lat di ayera atardi.

Venezuela a registrá for di dia 7 di mart último vários pèrdida di koriente, algun di kua a keda prolongá na asta mas di 24 ora, kua a paralisá aktividatnan durante 12 dia.

E gobièrnu di Nicolas Maduro ta responsabilisá oposishon i e Atministrashon estadounidense di algun supuesto atake elektromagnetiko kontra e sistema eléktriko ku ta kousa e pèrdida di koriente.

E ehekutivo a forma un Estado Mayor pa asina atendé e krísis, segun a keda anunsiá i ta trahando den modernisashon i restrukturashon di Corpoelec. Ademas a inisiá ku un plan di dies dia di rashonamentu di e elektrisidat, ku ta ekskluí Caracas, Vargas, Amazonas i Delta Amacuro.

Oposishon, di nan banda, a sigurá ku e korupshon den ministerio di Energia Eléktriko i mal maneho di míles di miónes di dòler destiná pa e sektor, ta loke ta responsabel di e krísis aktual ku e pais ta biba.