Basta droga haña den boto ku a ser hòrtá for di Duana den haf

Kier a bai kuné pa asina por a  saka e droga

1507
Ta basta droga a bin topa kuné den e boto.
Willemstad—  Un bingo formal ta loke ku Warda Kosta a kanta ayera den oranan di atardi ora a bai listra mas afondo den e boto ku deskonosínan a drenta haf i kue bai kuné djarason den oranan di anochi.
Anochi a hòrta e boto for di den haf i a bin hañ’é na e pir na Marí Pampoen.

Henter e investigashon a kuminsá djarason den oranan di mainta ora ku Warda Kosta a señalá un boto ku tres tripulante abordo nabegando ku un spit basta haltu drentando  Caracasbaai. Mesora a saka un di e Methal Shark tras di e boto pa asina por a kontrolá esaki. E boto a nabegá riba un spit bai mara na e pir na Kura Buriku pa despues dos di e tripulantenan bula baha for di e boto i drenta den un vehíkulo bai for di e sitio. A tuma nota ku nan mester a bai ku un djùk den nan poder. Warda Kosta mesora a pidi asistensia di tantu Polis komo Duana pa asina yuda den e investigashon. Mesora a kuminsá ku un investigashon na e boto unda a bin topa ku un hòmber sinta den esaki tabata mishi ku e motor. E hòmber no kier a bisa masha di e  dos persona nan ku a bai den e vehíkulo lagando e atras. Na e momento ei e dokumentonan di e boto no tabata tei i tambe e number ku tin riba e boto no tabata kuadra. Esaki a pone ku Duana a konfiská e boto bai kuné na unda a bai mara esaki na altura di e ofisina di Duana den Punda pa sigui ku e investigashon. Na e momento ei a kontrolá den e boto pero no a bin topa ku nada partikular.

Boto hòrtá

Den oranan di anochi di djarason kosnan a bin kambia formalmente ora ku Warda Kosta a haña e informashon ku algun suheto mester a presentá den Sta Ana Baai na altura di e ofisina di Duana i a bai ku e boto ku tabata konfiská. Mesora Warda kosta hasiendo uso di nan boto a Sali riba laman pa buska e boto miéntras Duaneronan na tera tambe a kuminsá kore kosta pa wak si ta señalá e boto. No mester a buska masha ya ku na altura di e kompleho ku ta wòrdu konstruí na Marí Pampoen na un pir a bin topa ku e boto mara pero nada di esnan ku a hòrtá e boto. Riba órden di Duana, warda kosta a bolbe konfiská e boto i a bai ku esaki bek den haf pero e biaha aki a bai kuné na e pir di Warda Kosta. Dimes a haña straño ku ta hòrtá e boto bai kuné i  a opta pa ayera den dia bai hasi un investigashon  mas afondo den e boto.

Basta droga

Ayera den dia a hasi uso di e aparato Mòl pa asina kontrolá den e boto i a tuma nota ku e aparato aki a reakshoná indikando ku sea tin droga den e boto i òf tabatin droga den e boto. Mesora a kuminsá desmantela e boto i tabata den e bankinan a bin topa ku un kantidat di pakinan ku tabata kontené droga. Segun informashon no konfirmá sigur a bin topa ku mas di 150 kilo di kokaina ku tabatin skonde den e banki di e boto. Despues di a logra saka tur e droga nan ku vigilansha di e tim di aresto a bai warda e droga pa asina esaki wòrdu destruí mas lihé posibel. Sigur e hòmber ku a keda último den e boto djarason último  lo bai wòrdu detené pa asina duna deklarashon di e droga ku a ser haña bon hinka den e banki di e boto. E kaso ta den investigashon.