Manifestashon ku morto registrá kontra presidente di Honduras

38
E hóben ku a pèrdè su bida tabatin apénas 17 aña di bida.

TEGUCIGALPA – Un menor di edat, di 17 aña, a pèrdè su bida den oranan di ayera na Honduras pa un tiru ku el a risibí durante un manifestashon na sùit di e pais pa eksigí salida di e presidente Juan Orlando Hernandez, konsiderando ku su reelekshon tabata un ku froude.

E víktima a keda identifiká komo Wilfredo Monaca, segun tur kos ta indiká, un hóben ku a keda alkansá pa un herida di bala supuestamente na man di seguridat publiká na momentu ku nan tabata intentá di kore ku a multitut for di e sitio.

Moncada a keda trasladá pa un Hospital Universitario di Tegusicgalpa, unda den oranan di mardugá el a bin fayesé debí na gravedat di e herida ku el a sufri.

E víktima a resultá heridá den un protesta na Choluteca, den kua hóbennan den nan mayoria ku kara tapá, a konfrontá outoridatnan.

Durante e konfrontashon tabatin aktonan di vandalismo manera entre otro algun kosnan kibrá ku piedra, palu i otro ophetonan kontundente.

E organismo di seguridat a konfirmá ku nan ekipo di investigashon ta trahando pa asina klara e echo, den kua manifestantenan supuestamente a destruí otro vários negoshinan privá.

Honduras ta biba un krísis apolítiko i sosial despues di e supuesto froude ku segun oposishon di e pais, tabatin den elekshonnan general di dia 26 di novèmber di aña 2017. Esaki na momentu ku e presidente aktual di Honduras a supuestamente keda reeligí.

Den un intento di superá e krísis, aña pasá a selebrá un proseso di diálogo ku na final no por a yega na un akuerdo, manera pa asuntunan di reelekshon presidensial i amnistia na fabor di personanan detené durante manifestashonnan violento registrá despues di aña 2017.

Outoridatnan di Honduras a detené entre sèptèmber di aña 2018 i luna di mart di aña 2019, e agente Olvin Fernando Gonzales i e militar Denis Omar Caceres, ámbos akusá di morto di un menor di edat i un hòmber durante protestanan di aña 2017.