Shete morto registrá den aksidente di bùs na Bolivia

96
Forma e bùs despues di bòltu.

LA PAZ – Un total di shete persona a pèrdè nan bida, entre nan un menor di edat, i otro 29 mas a resultá heridá di gravedat despues ku e bùs den kua nan tabata biaha a aksidentá na Bolivia. Esaki riba e mesun karetera ku a registrá aksidentenan grave e mesun aña aki.

E komandante polisial di Oruro, Jose Pizarro, a indiká na medionan di komunikashon ku e aksidente a keda produsí na e departamento oksidente di e pais, na e karetera di Potosí.

Pizarro a konfirmá e fayesementu di shete okupante di e bùs, un di nan un menor di edat i e 29 heridanan, algun di gravedat, ku a keda evakuá pa diferente sentronan sanitario.

Segun outoridatnan, e aksidente aki lo tabata relashoná ku un pèrdida di kontrol di e vehíkulo, loke ku por a okashoná ku esaki a bai bòltu na e banda links di e karetera. Di otro banda a indiká ku ta sospechá ku e shofùr di un forma òf otro lo por a pega soño tras di stür.

Di su banda, Alex Flores, dokter di emergensia di e Hospital Oruro-Corea, a manifestá na medionan di komunikashon ku bastante di esnan heridá ta di gravedat, hopi di nan ku trouma na diferente partinan di kurpa, pero ku tur ta den un situashon stabil.

Un di e personanan heridá, kende no a keda identifiká, a sigurá ku e momentu di e aksidente tabata un momentu horibel i kua a keda registrá na momentu ku diferente pasahero tabata na soño i di un forma sumamente rápido.

E vehíkulo aksidentá tabata di e kompania Trans Tupiza, kende tabata realisá un rekorido entre e lokalidat Boliviano di Challapata i Potosi.

E mesun karetera aki tabata e sitio pa vários aksidentenan grave e aña aki, un di nan den luna di febrüari tras di lomba, ku 24 víktima mortal i 15 herido den un choke den oranan di mardugá entre un bùs i un trùk.

Na luna di yanüari último, otro 22 persona a Verde nan bida i otro 37 mas a resultá heridá den un choke frontal di e busnan riba e mesun via aki.

Aksidentenan di tráfiko na kareteranan Boliviano ta kousa kada aña di nobo, alrededor di mil morto i masoménos 40 mil herido.