Club Franciscain di Martinique lo tin’e difísil pa ripití nan titulo

Awe 8 or kontra di Jong Holland na Brievengat

44
Stephane Abaul, ábil bolante i miembro di selekshon di Martinique ta na Kòrsou hungando pa Club Franciscain.
E fransesnan di Martinique lo tin un wesu duru kontra di Jong Holland di Kòrsou.
Defensa Nicolas Zaire, tambe ta hunga pa selekshon nashonal di Martinique. Riba e foto na Kòrsou den Antoine Maduro.
Brievengat– E ekipo di Martinique, Club Franciscain ta e aktual kampeon di Caribbean Club Shield i nan niun otro intenshon sino pa ripití nan titulo di 2018. Ku hungadónan den nan plantel kende a partisipá pa nan selekshon nashonal durante Concacaf Gold Cup di 2013 i 2017, e “Pretu ku Bèrdènan” ta dirigí pa sigui den e siguiente rònt di Kampeonato di Karibe. Nan siguiente wega ta awe kontra di Jong Holland di Kòrsou.

Club Franciscain kisas ta e ekipo mas mihó ku a yega e kampeonato. Nan te e organisashon di futbòl mas eksitoso di Martinique i tin hungadó “full prof” den nan seno. Ademas, tin hungadó ku hamber pa yega final i kisas topa ku Jong Holland, despues ku selekshon di Kòrsou den nan stadion nashonal a kita posibilidat pa Martinique bira kampeon di Karibe. Esaki a sosodé na 2017 durante e último kampeonato di Karibe na nivel di selekshon. Club Franciscain tin un kantidat di 18 titulo di kampeon nashonal riba nan nòmber. Esaki ta inkluí 2017 i 2018 miéntras e aña aki nan ta enkabesá e tabla di posishon na Martinique. Aparte di esei nan tin 15 torneo di kopa nashonal den nan bolsa. Na nivel di Karibe, Franciscain ta den nan mihó forma. Te ainda e klup a paresé na solamente dos Kampeonato di Karibe pa Klup, pero na 2018 a titulá kampeon di e Pre Temporada di Champions League di Karibe, ku ta e aktual Caribbean Club Shield. Despues di a gana e ekipo di Sürnam,  Inter Moengotapeo, na 2018 den e wega final, e Pretu ku Bèrdènan di Martinique a sigui pa e siguiente rònt di e kampeonato di klup di Karibe. Einan e fransesnan a sorpresa tur siguidó di futbòl karibense, logrando e di kuater lugá ku un viktoria di 2-1 kontra di Central FC di Trinidad. E viktoria a pone nan yega e rònt eliminatorio di Champions League di CONCACAF. Pero un fayo garafal di nan arkero a pone ku nan no a logra sigui, despues di un derota na pinalti kontra di Deportivo Walter Ferreti di Nicaragua.

E kampeon di Martinique, Club Franciscain.

Un kos ta sigur, ku nivelnan haltu konkista ainda bou di nan nanishi, e martinikeñonan ta hunga ku ala di falki. Pero nan pul no tabata fásil. Den pul D tabatin futbòl di kaliber. Pa nan di malu, nan ta bolbe bin topa un ekipo di Sürnam riba nan pasio pa gloria. E biaha aki ta toka turno pa SV Robinhood. E 24 biaha kampeon di Sürnam, a bini pa duna revancha ku nan kompatriotanan a sufri na man di e fransesnan. Nan a topa otro den e promé wega dje pul unda e fransesnan a gana fásil 3-1. Aruba na 2018 a sali na di kuater lugá dje torneo i e biaha aki nan a bini ku Dakota. E muchanan dje isla bisiña a bini Kòrsou pa solamente duna un mihó prestashon ku Nacional di Aruba aña pasá. Por poko Franciscain ta kai vensí despues di a logra empatá den seramentu di e wega na 1 gol.

Nan hungadó mas konosí i eks kapitan di selekshon ta e Patrick Percin, kende ta suplente den e tim. Percin kende ku su 15 aña a firma ku e ekipo di futbòl franses Auxerre, no kier a keda Oropa i ta bolbe su isla unda el a hunga mayoria di su karera na kas. Anke e tin 42 aña, e tabata e klave den e ekipo pa nan logra e titulo kampeonil lokal i di Caribbean Club Shield. Patrick a fungi alabes komo kapitan di e selekshon nashonal di Martinique. Aparte di Percin, e pretu ku bèrdènan ta trese Kòrsou dos di nan mihó bolantenan den kampeonato nashonal i ámbos ta forma parti di e eksitoso selekshon nashonal dje pais. Ta trata di Stephane Abaul i Christophe Joubon. Otro miembro di e selekshon nashonal ku ta hunga pa nan ta e peligroso bolante Yann Thimon. Yordan Thimon, kende a hunga pa e selekshon di Martinique na 2017 durante Kopa di Karibe, ta un otro defensa fuerte dje ekipo riba ala robes, kende tambe ta na Kòrsou. Nan  hòmber bou di lata lo ta Didier Sully. Entre esnan kende ta bini Kòrsou ku a hunga Gold Cup pa Martinique na 2017 ta, Nicolas Zaire (defensa), Stephane Abaul (bolante), Yann Thimon (Bolante/Atakante) i Johny Marajo, delantero.