“Kòrsou” awe den semifinal di torneo Concacaf

103
Hungadónan di e ekipo trikolor di Jong Holland.
WILLEMSTAD—E torneo ku a resultá un fiesta di futbòl na Kòrsou, Concacaf Caribbean Club Shield, awe lo konosé su penúltimo fecha. Lo bai ta e di 5 di e 6 fechanan di wega di e torneo. Esaki na momentu ku lo bai tin 2 wega, unda ámbos lo hunga riba tereno di Stadion Ergilio Hato na Brievengat.

Primeramente pa mitar di 6 atardi, Robin Hood di Sürnam lo topa ku Weymouth Wales di Barbados. Miéntras ku pa 8’or di anochi, e trikolornan di Jong Holland, den representashon di nos dushi Kòrsou, lo sali kontra Club Franciscain di Martinique. Ganadónan di awe lo topa djaluna awó den e gran final di e torneo.

Jong Holland
E ekipo lokal sigur ta konta ku sosten masal di Kòrsou awe, pa asina por logra e triunfo i e pase pa final, den torneo ku ta hungando na Kòrsou den aña ku e ekipo ta selebrando nan di 100 aña di eksistensia, E ekipo ta dunando tur ku tin i representando nos isla dignamente unda ku nan no a risibí gol kontra hungando riba tur fecha (4) di e torneo, ku futbolistanan dunando un bon futbòl i destakando.

Asistiendo sigur lo bo gosa tambe di aktuashon di futbolistanan ku por wòrdu konsiderá entre e esnan ku mas a destaká durante di e torneo. Pues hungadónan manera kiper Julian Gaviria, huntu ku tambe Bryan Anastacia, Glenciene Gregoria, Alejandro Cardona, Charles Martina, Hugo Acosta, Ruensley Leuteria i Siebren Hoekstra, ta konta ku bo sosten awe nochi, pa asina nan logra nan meta.