Dos morto den derumbe di edifisio na Rio de Janeiro

99
Segun bisiñanan, algun persona a keda entre e restunan despues di e derumbe.

RIO DE JANEIRO – Un total di dos persona a pèrdè nan bida i otro dos mas a resultá heridá na momentu ku dos edifisio residensial di kuater piso kada un, den un bario popular di Rio de Janeiro, a derumbá. E ekipo ainda ta buska mas víktima entre e restunan.

Bosero di bomberonan di Rio de Janeiro a konfirmá morto di e dos personanan i reskate di dos persona ku a resultá heridá. Ademas a señalá ku abitantenan di e sitio a indiká ku otro víktimanan a keda entre e restu di e edifisionan den a bario di Muzema, na zona ost di e siudat.

E organismo di yudansa a informá tambe di reskate di un hòmber di parti e propio bisiñanan, kende a keda trasladá pa e Kuerpo di Bombero pa un sentro médiko den serkania.

Debí na e rísiko di derumbe di otro edifisionan den serkania i pa fasilitá labornan di reskate di bomberonan i di Defensa Sivil, outoridatnan a disidí di rondoná e zona.

E alkaldia di Rio de Janeiro, ku ta spera pa entregá e balanse inisial relashoná ku víktimanan i dañonan material den e próksimo ora, a komuniká ku serka di 60 edifisio den e region konstruí di forma iregular, ta den zonanan di peliger.

E bario Muzema, kontrolá pa milisianan armá a impedí ku pro a basha e edifisionan iregular abou. Ta trata aki di un di e sitionan mas afektá pa e áwaseru fuerte ku a kai den oranan di siman pasá na Rio de Janeiro i ku a kousa dies víktima mortal i kantidat grandi di herido.

Abitantenan di e lugá a denunsiá ku milisianan, kua nan ta organisashonnan kriminal integrá pa eks agentenan polisial i agentenan aktivo korupto, ta okupá terenonan i a konstruí residensia nan pa asina bende esaki nan di forma ilegal.

Segun informashonnan di e gobernashon di Rio de Janeiro, e fuerte tormentanan a laga saldo di 1.200 persona ku mester a keda evakuá.