Kanal di televishon CBA su porta nan a sera

554
Den e forma aki e situashon tabata ayera mainta na C.B.A. kanal 11.
WILLEMSTAD,—-Ayera den ora nan di mainta trahadónan di e kanal di televishon C.B.A. den boka di pueblo Kanal 11 a haña bishita ku sigur no a kai na nada na nan agrado. Mester bisa ku den ora nan di mainta ‘E Mulina’, a haña informashon ku algun trahadó di Belasting Kantor a bisa e trahadó nan di C.B.A. ku nan mester bandoná nan boka di trabou.

Esaki sigur a kue tur e trahadó nan for di base, paso di ningun manera nan no por a pensa ku nan dia ku a habri bunita diripiente esaki a bira un pesadia pa kada unu di nan. Nos a keda pone na altura ku mes ora un tristesa grandi a reina bou di e trahadó nan di e kanal di televishon C.B.A.

‘E Mulina’, ayera nochi na diferente okashon a yama señor Ramon Chong ku ta gerente di e planta di televishon ariba menshoná, pero di ningun forma nos no a logra di haña señor Ramon Chong na telefon, tambe nos a drenta den kontakto ku dos otro trahadó klave di C.B.A. pero nan tampoko no a kontesta nos yamada.

Den kurso di e dia di awe ‘E Mulina’, sigur lo bai sigui tuma kontakto ku esun na kabes di e kanal di televishon. Mas aleu nos tin informashon ku algun di e trahadó nan a keda man na kabes, paso nan no sa kiko lo bai pasa ku nan. ‘E Mulina’, sin duda lo bai sigui e desaroyo nan aki di C.B.A. ku wowo nan di falki.