Kousa di pobresa i ki konsekuensha e por tin pa bo bida

295
Sèn ta e kousa mas grandi den pobresa i ta trese limitashonnan den un persona su bida.
Willemstad- Pobresa tin konsekuensha riba un persona su bida. Pobresa ta pone ku un persona tin ménos chèns di un karera, bo situashon di bida I bo salu. Bèrgwensa, isolá bo mes for di mundu, stress, insiguridat I depreshon por ta konsekuensha di pobresa. Stress tempu largu of konstante ta trese un situashon negativo den e persona su bida I pone ku e no por hasi un eskoho den su bida.

Esaki ta pone ku bo mente ta bai atras. Bo por kompar’é ku na momentu ku bo tin henter un anochi sin drumi. E problema mas grandi di pobresa ta sèn , esaki ta pone ku bo no por pensa riba otro kosnan i ku ta e kosnan di promé nesesidat so ta loke e persona ta pensa pa alkansá. Riba un tèrmino largu di stress króniko esaki ta pone ku e persona ta ménos bezig puntrando su mes kiko ta mas importante den su bida i ku e ta lubidá su mes komo persona.  Biba salu ta importante , pero segun estudionan hasi ta mustra ku na momentu ku bo no tin sèn bibamentu salu ta kai atras. Kompra di berdura, fruta i otro kosnan di nesesidat pa biba salu ta kosta basta sèn. Tambe sèn no ta yega pa invertí den ehersisionan pa mantené un bon salu. No lubidá ku mester paga un kontribushon chikí pa sierto remedinan òf tin momentu ku esaki no ta ni keda kubri i mester paga pe. Esaki ta pone ku tin biaha e persona no ta alkansá pa por tuma su remedinan.  Pobresa tambe por pone ku e persona ta isolá su mes for di mundu. Dor di su presupuesto asina limitá  ta pone ku e no ta partisipá na aktividatnan.  Loke tambe pobresa ta trese ku e persona no por tin un vehíkulo i transporte públiko tambe ta kostoso. Uzo di telefon, internet i kòmpiuter tambe por ta un problema. Ku e konsekuensha ku e persona no por  interkambiá i amplia su konosementu.  Pa loke ta trata muchanan ku ta biba den pobresa esaki tambe tin influensha pa nan. Ku esaki ta pone ku e mucha no por sali hopi, no por sigui sierto kursonan.  Pa loke ta trata esakinan nan ta kosta sèn i pone ku tin limitashon pa e mucha tambe. Otro problema tambe ta ku e muchanan aki masha tiki biaha ta invitá un amigu/a serka nan pa sea bin hunga na nan kas òf na momentu ku nan hasi aña. Na skol pobresa por tin influensha enkuanto aktividatnan na skol ku mester trese un kontribushon i esaki ta pone ku e mucha tin ku laga esaki pasa bai. Momentu ku bo ta den pobresa òf problemanan finansiero no tene miedu di papia esaki i pidi yudansa. Tin hopi instansha kaminda por duna un man, tambe bo por papia ku un persona di konfiansa kual por ta un amigu òf un miembro di famia. No keda ketu papia loke ta e problema i no keda kana rònt ku esaki wanta, paso esaki por tin hopi konsekuensha pa abo i bo famia.•