Piesa nobo kanta pa Zuhgeli Marchena graba ku 911

465
Su piesa nobo “Dios Libra Mi” ta zona bon”.

WILLEMSTAD,—-Ayera e kantante ku ta forma parti di agrupashon musikal den ámbito di Kòmbèk na Hulanda Zuhgeli Marchena a pone su piesa nobo riba merkado. Ta trata aki di un piesa ku ta komponé ta Tula Bernadina i areglá pa Eric Ignatia.

Nos tin ku bisa ku e agrupashon musikal 911 ta move bon den farándula na Hulanda. E piesa nobo di Zuhgeli Marchena ya for di awe lo bai kuminsá na diferente radio emisora tantu na Kòrsou pero tambe na Hulanda. Tambe nos a bin tuma nota ku Tula Bernadina awor a habri su ala nan komo kompositor den diferente género musikal.

‘E Mulina’, tin informashon ku tin plan pa bin ku e banda 911 Kòrsou promé ku fin di aña pa algun presentashon. Nos a trata na drenta den kontakto ku gerente di e banda en kuestion, pero mirando e ora di diferensia ku tin entre Kòrsou i Hulanda, esei a pone ku nos no a logra di haña kontakto ku gerente di agrupashon musikal 911.

Den kurso di awe nos ta bai bolbe drenta den kontakto ku gerente di agrupashon musikal 911, pa asina nos tende for di su boka ta ki temporada su banda lo bai ta na Kòrsou, paso e interes pa e banda 911 presentá na Kòrsou ta hopi grandi. Pa loke ta trata e piesa nobo di Zuhgeli Marchena for di awe bo por yama bo radio emisora preferí i pidi pa e piesa nobo di Zuhgile “Dios Libra Mi”.