Van Kwartel ta sigui kobra na RdK

700
Kobra: van Kwartel ta sigui kobra na RdK
Punda—Eks direktor di RdK, Roderick van Kwartel ta sigui kobra su salario. Esaki ta lokual fuentenan interno na e kompania a revelá na Vigilante. E dos otro empleadonan, Cijntje i Kinburn si no ta kobrando mas.

Mas aleu, Refineria di Kòrsou a inisiá tambe e proseso di retiro tantu den korte komo den prosedura eksterno. No ta konosí ki dia di e kaso lo presentá. Pa lokual ta trata e parti di Ministerio Públiko, te ainda no ta mustra ku lo bai tin un proseso entamá, kontrali a lokual e impreshon ku gobièrnu di Korsou. Segun Promé Minister, Eugene Rhuggenaath durante un reunion públiko di Parlamento, Gobièrnu e entrega un karta na Ministerio Públiko. Segun e promé minister ta trata di un karta òf petishon splikando e sospechosonan di soborno ku a tuma lugá durante negoshashon ku un sosio nobo pa RdK. Segun Rhuggenaath no ta trata di un keho sino mas bien un splikashon di lokual a tuma lugá. Pero den mesun rosea el a añadí ku e karta ei por kondusí na un investigashon penal. Entretantu no tin ningun señal di un proseso penal.

Gilbert Martina a yega di deklará ku a pone e tres funshonarionan riba non aktif pa sigurá ku e proseso pa yega na un sosio nobo no wòrdu afektá. A bin sali na kla awor ku e lokual a sosodé, no tabatin niun influensha riba e sosio kandidato nobo, pasobra esei a opta pa laga e RdK kai, sin esaki tabatin nada di haber ku lokual RdK a akusá e empleadonan riba dje. Entretantu ta konosí ku a laga traha un investigashon kiko a sosodé den e proseso di negosashon unda a deskreditá e tres funshonarionan di RdK. Segun Martina miéntras e investigashon tabata  andando, lo a tene  funshonarionan riba non aktif. For di no aktif awor a resultá ku dos di e empleadonan no ta kobrando, miéntras esun kende a inisiá hinter e problema, ta kobrando tur luna ainda.