Stress bou di muchanan ta trese problema pa ku siñamentu

108
Willemstad- Hopi biaha nos ta kere ku muchanan no por sufri di stress I ku ta hende grandi so ta esnan ku por sufri di esaki.

Despues ku a hasi un investigashon a bin saka afó ku 4 di 10 mucha ta sufri di stress sikológiko I ku esaki ta pone hopi biaha ku nan ta haña problema ku siñamentu. Pa loke ta trata e síntomanan ku e mucha por tin ta  ku e ta sintié hopi kansa I ku ni skol e ke bai mas, tambe ku e ta sinti sierto dolónan ku no por splika. Na e momentu ei por pensa ku e mucha por tin algun malesa, pero despues ku hasi algun tèst ta bin saka afó ku no tin nada ku e muchanan. Kiko ta nifiká stress? Esaki ta na momentu di un situashon kaminda bo no por karga kuné i bo ta sali for di balansa. Stress ta bira un problema na momentu ku bo ta sufri di esaki pa un tempu largu i ku e ta algu króniko i hopi pisa pa bo atendé kuné. Na momentu ku bo ta sufri di stress ta ora ku tin situashon ku bo no por biba kuné i ku esaki por bira ku bo ta haña nachtmerrie. Pa kada mucha e momentu ku nan ta eksperensha stress ta otro. Tin sierto karakterístikanan ku por detektá ku e mucha ta sufri di stress mirando ku bo kurpa tin hopi kos ta pasa kuné. Esaki ta wòrdu yama e reakshon di stress. Esaki ta un reakshon ku ta wòrdu okashoná dor di sierto situashonnan ku ta kousa stress, algun ehèmpel ta miedu,  zonido duru, temperatura haltu, holónan fuerte, situashonnan ku bo no por kontrolá. Si e hormona di stress keda largu tempu den e mucha su kurpa esaki por produsí problema ku funshonamentu ku su órganonan i tambe problema ku prosesonan ku su kurpa mester pasa aden. Momentu ku e mucha ta sufri di stress i tin problema ku sierto materianan esaki por trese ku e ta bira insigur di su mes, paso e no ta komprondé nada i tambe e por sintié intimidá. Ku esaki ta trese ku si e mucha no ta komprondé e materia e por trese ku e ta sintié un persona ku a frakasá. Papia ku bo yu i wak si bo ta logra di detektá na tempu ku si e ta sufri di stress. Ya bo por buska e yudansa nesesario promé ku ta lat.