”Ta bon pa stimulá nos hubentut pa nan tambe drenta e sektor di krio di bestia”

Segun Parlamentario Calmes

282
Parlamantario Calmes tumando su kurso kon ta  kuida un lamchi.
Willemstad- Djaweps 11 aprel 2019, Parlamentario pa PIN, Rennox Calmes, a hasi un bishita di trabou na servisio  di Agrikultura i Peska (AVB, antes LVV) ku ta forma parti dje Ministerio di Salú, Medio Ambiente & Naturalesa

Sr. Calmes a haña un rekorido riba e tereno di AVB, en partikular n’e parti di krio di bestia manera porko, kabritu i karné. Durante di e bishita di trabou aki, Sr. Calmes a tuma nota di e trabounan ku ta wòrdu hasi dor di empleadonan, pa kuida bestianan di kalidat. Sr. Calmes a risibí hopi informashon riba e forma di kria i kuida e bestianan manera porko, kabritu i karné.

AVB no solamente ta kria i kuida e bestianan, pero tambe ta bende yu di bestia ku kriadónan di bestia pa produkshon di karni pa kome. Krio lokal di bestia tin un impulso positivo riba nos ekonomia i tambe ta minimalisá nos dependensia di importashon di karni i alabes ta skapa nos fluho di divisa bai afó.

Parlamentario Calmes a keda impreshoná ku e dedikashon ekspresá dor di e trahadónan pa ku nan trabounan di kriamentu i kuidamentu di e bestianan. E ta un trabou ku ta eksigí hopi dedikashon i amor pa bestia. E aktual konosementu i eksperensia dje trahadónan ta di balorá i mester wòrdu traspasá pe siguiente generashon.