Ta urgí públiko na playanan pa despues di grel tira karbon den barínan spesial pa tira karbon aden

Pa evitá aksidente na playa durante Siman Santu

221
Man ku kemadura di e mucha ku a bira víktima.
Willemstad – Ministerio di Salú, Medio Ambiente i Naturalesa ta lamentá ku den pasado na diferente okashon personanan na playa a sufri kemadura na pia i man despues di a trapa riba karbon ku ainda tabata kayente.

Resientemente esei tabata e kaso atrobe i hopi di nos por a mira e imágennan di e suseso aki riba Facebook. Relashoná ku esaki ministerio ta informá ku tur e susesonan lamentabel aki por a keda evitá simplemente si a depositá e karbon den e barí spesial destiná pa esaki ku tin na nos playanan.

No ta pòrnada ministerio a bini ku e fasilidat di barínan pa tira karbon aden na nos playanan. E fasilidat aki ta pa evitá ku aksidentenan ta tuma lugá pero tambe pa tene nos playanan limpi. Durante e dianan di Siman Santu aki nos playanan lo ta hopi bishitá i den e kuadro aki Ministerio di Salú, Medio Ambiente i Naturalesa ta urgí tur esnan ku ta bishitá nos playanan pa tene esakinan limpi i tira karbon den e barínan spesialmente destiná pa esaki. Evitá aksidente i alabes tene nos playanan limpi.