Tankero ku kombustibel a drenta Kòrsou ayera

242
Mará: Scot Berlin den haf ayera.
Isla—  E tankero Scot Berlin, ayera a drenta haf di Kòrsou i bai mara na unu dje wafnan (djèti) banda di e tankinan di Curoil.  Scot Berlin ta un tankero ku ta karga un tonelada di 5134 nabegando bou di e bandera di Malta. Algun minüt promé di 12’or el a mara na waf.

Scot Berlin probablemente ta karga kombustibel pa Curoil i hiba pa Kòrsou i Boneiru. Manera ta konosí miéntras e situashon di refineria Isla ta abou, Curoil ta importá kombustibel i abastesé esaki den su depósito. Entretantu, empleadonan di Refineria Isla BV te sigui pidi mas klaridat riba e situashon. E dianan aki, tin un insiguridat rondó di e posishon hurídiko di e empleadonan kende ta trahando den servisio di Refineria Isla PDVSA. Te ainda miéntras e refineria tabata abou, salarionan a sirkulá normal i PDVSA a sigui paga su kota di hür pa e refineria. Entretantu a bira konosí ku PDVSA tei para tur pago.  Segun RdK, di nan banda, e proseso di buska i yega na un partner pa manehá, operá i modernisá e refineria ta di sumo importansia.

Pero tankeronan ku krudo foi Venezuela pa 2019 tabata nulo. Aparte di e problema politiko na Venezuela, hopi kompania internashonal ta vigilando PDVSA ku wowo di falki. Entre nan por ehempel 4 kompania internashonal, Exotic Waves, Ammon Shipping, Clion Limited i ULM Blandford, a imponé beslag riba e tankero Icaro. E kompania nan ta argumentá ku PDVSA mester paga promé i despues nan ta laga e krudo den e tankero bai, balorá na 3 mion dòler estado unidense. Refineria di Kòrsou (RdK), den estrecho konsulta ku Refineria Isla, a entamá e wisio sumario kontra di esnan ku tin beslag riba e krudo almasená riba e barku Icaro. E meta ta pa logra ku ta almasená e krudo ku tin riba e barku den tankinan na tera i ta laga e barku Icaro sali buska krudo ku ta destiná pa Kòrsou na Venezuela. Entretantu siman Korte na Punda a duna pèrmit pa e los e tankero bou di sierto kondishon. Pero Icaro nunka mas a regresá.