Awe nochi tin un reunion importante rondó di SP su futuro

292
E motor tras di “S.P.”

WILLEMSTAD,—-Di informashon ku nos ta disponé di dje ta bisa ku, awe nochi lo bai tin un reunion krusial pa loke ta trata futuro di agrupashon musikal Super “S.P.” Perfekta. E reunion aki ta bai disidí futuro di e banda ariba menshoná.

Mester bisa ku tin basta rumor den kaya ku e banda su dia nan ta konta, di otro banda tin hende ta bisa ku ya e banda a pasa pa historia. ‘E Mulina’, a drenta den kontakto ku un persona ku ta hopi serka di e banda i e la bisa nos ku awe nochi e desishon por bai kai, si e banda ta sigui òf e ta wanta.

Nos tin ku bisa ku musikal mente e formashon semper a trese produkshon nan bon i nan tin un super bon kompositor i areglista den kas. Pero tin un kos ku ta stroba e banda di bai dilanti, i te ku dia di awe ningun hende no por saka afó ta kiko ta e problema ku ta konfrontá e banda Super “S.P.” Original.

Ya den kaya tin rumor nan ta kore ku tin algun músiko, ku ya a entrega òf ta bai karta di retiro, pa asina pasa forma parti di otro agrupashon musikal. Awe nochi ‘E Mulina’, di un manera òf otro ta bai sigui e desaroyo nan rondó di e reunion en kuestion. Si nos keda kla ku mas informashon nos ta bin ku esaki nan mañan ku Dios ke.