Empleado Banko Sentral riba lista di aresto

Aresto por kai un ora pa otro den kaso Safiro

3516
Punda—Ministerio Públiko, despues di a pèrdè e proseso penal den kaso Safiro I, a kontinuá ku investigashon den Safiro II, kual ta regardá e parti di labamentu di plaka. Manera Vigilante a deliniá, despues ku Ministerio Públiko no a inkluí e parti di e investigashon di labamentu di plaka den su investigashon riba desvio di impuesto, tin indikashon basta konkreto ku un aresto tei kai promé òf despues di dianan di fiesta.

Fuentenan den seno di e kaso a revelá na Vigilante ku funshonarionan hudisial a tene kuenta ku aspektonan den bida priva di un sospechoso adishonal den kaso Safiro II lokual a tarda e proseso algun dia. Pero awor ku e parti aki ta tras di lomba, fiskalnan enkargá ku e persekushon den Safiro ta kla pa sigui. Chèns ta hopi grandi ku un funshonario den Banko Sentral lo kai pa asina kuminsá traha riba e persekushon di esnan sospecha den labamentu di plaka fo’i fondonan di penshun personal, despues ku, a enkargá konseheronan fiskal pa traha dokumentashon di eksonerashon. Por spera desaroyonan adishonal unda sigur 3 akountent lo wòrdu yamá pa duna deklarashon di kuentanan anual i konseho na Banko Sentral.