Robbie Lottery a entregá petishon pa retirá 178 empleado

3905

Punda—Ayera e kompania di Robbie Dos Santos, a hasi petishon pa retiro di 113 empleado den servisio fiho i 65 kontraktante. Esaki ta lokual Dos Santos a konfirmá na Vigilante ayera. E petishon di retiro a tuma lugá despues ku tur intento di Dos Santos pa logra tene kuentanan bankario na Kòrsou, no a resultá.

Manera ta konosí, despues di 32 aña den un relashon di kliente-banko, Maduro & Curiel’s Bank ta laga Robby Dos Santos kai. Pa final di mart, gerensha dje banko no ke mira niun kuenta di Administratiekantoor Dollar NV ni di Robbie Dos Santos mas serka nan. E periodo aki a wòrdu alargá entretantu pa final di aprel.

Segun Banko Maduro, Robbie Dos Santos ta den negoshi di loteria i ta kai bou di e kategoria di kuentanan di riesgo. For di aprel 1978, Dos Santos tabatin MCB Bank komo su banko prinsipal unda e ta depositá sèn i hasi negoshi via di su kuenta nan. Mayoria empleado di Dos Santos ku ta traha den loteria tambe ta kobra via di MCB. E “banko amigu” a manda bisa Dos Santos pa sera su kuentanan i buska otro alternativa. Segun abogado di Dos Santos den asuntunan sivil, mr Bertie Braam a splika ku wega di number na Kòrsou ta un negoshi lokal ku ta wòrdu kontrolá pa Fundashon Wega di Number Kòrsou. E abogado a mustra den korte ku MCB mester kumpli ku eksigenshanan di bankonan internashonal korespondiente i netamente esei awor aki tin e relashon ku Dos Santos den problema. Pero segun Braam, e bankonan korespondiente no tin nada di haber ku transakshon nan lokal i pa tal motibu no tin rason pa sera kuenta di Dos Santos. Aparte di esei su kliente no ta partisipando den niun labamentu di plaka via di su negoshi. MCB a pone Dos Santos den un posishon difísil ku nan desishon. Ta trata di e kompania na Kòrsou Dollar Administratiekantoor ku ta bende loteria. Na St. Maarten e sukursal di MCB, Windward Islands Bank a hasi meskos.