Dama ku a sufri kemadura nan grave rekuperando satisfaktoriamente

Den ofisina di number na Punda

2417
Willemstad— Sigur ta un grato notisia di tende ku e kondishon di e dama ku a sufri kemaduranan grave den e ofisina di number ta rekuperando.

Vigilante por a komprondé serka algun ser kerí di e víktima ku a sufri kemaduranan basta serio den e ofisina di number Joe Black den Punda ku ta situá nèt enfrente di San Marco Kasino ku su kondishon ta unu hopi stabil. Ta trata di e kaso unda den e ofisina di number den Punda a surgi un eksploshon lagando e dama bendedora di number malamente kima. Mesora a hasi e trámitenan pe  bai Colombia pa asina e por haña asistensia médiko mas avansá. E dama a keda interná den e kuido intensivo pa e kemaduranan ku e la sufri i tambe mester a haña atenshon speshal pa su pulmon nan. E último informashon ku Vigilante ta disponé ta ku ya e dama no ta interná mas den e Hospital na Colombia pero ku si e ta hañando tratamentu ketu bai entre nan vários terapia. E dama aki mes ta super kontentu ku e la bin  ta rekuperando i ta komunikando ku su ser kerinan aki na Kòrsou. Sigur esaki ta un bon notisia pa famia di e dama i tambe tur ku konosé.