9 kompania ta firma akuerdo di konfiabilidat ku RdK

791
Ararat—9 kompania riba teritorio internashonal ta hopi interesá den Refineria Isla. Esaki ta lokual promé minister Eugene Rhuggenaath a duna di konosé durante un enkuentro ku prensa.

Anke e promé minister no a menshoná esaki, chèns ta grandi ku ta trata di un kompania chines i unu estado unidense. Lokual a minister a splika na prensa lokal ta ku den un kantidat di 60 kompania, tin 9 kompania kende a firma un akuerdo di konfiabilidat. Mas aleu e la splika tambe ku 2 di e kompanianan ta bini Kòrsou pa hasi ehersisionan di diligensha. Na e momentunan aki, Refineria Isla ta den un problema serio di transishon i finansiamentu di e periodo ku ta negoshando pa logra firma un sosio nobo. Na promé instante, RdK huntu ku Isla BV a inisiá un proseso pa logra kita beslag fo’i riba e barku Icaro, ku tabata kargá ku krudo (Sta Barbara) na Bullenbaai.  E idea tabata pa kita e beslag i manda e krudo mesora di Bullenbaai pa tankinan na Refineria Isla. Unabes e krudo ta den tanki di Refineria Isla BV por start rafinashon. Tantu RdK komo Isla BV a pensa ku PDVSA lo permití benta di e rafinashon dje krudo riba Icaro unda por finansiá e.o. salario di personal na Isla BV. Pero kosnan a bin kambia. Aparentemente, PDVSA tin intenshon pa bende e produkto rafiná fo’i e krudo riba Icaro sin manda e sèn Kòrsou. Den un karta na Refineria Isla BV, PDVSA lo a ordená pa no entrega e kombustibel na Curoil ya ku PDVSA tin un kumpradó kaba. Esaki a nifiká ku e strategia di Isla BV i RdK a bin kai na awa i konsekuentemente awor ku Isla BV no tei haña sèn, a surgi un problema serio pa mantené e planta den operashon pasobra no tin sèn pa paga salario.

Promé Minister Rhuggenaath a duna un indikashon pa e solushon. Anke esaki no tabata muchu klaro, e la krea e impreshon ku miéntras ta negoshando ku e 9 kompanianan interesá, Refineria di Kòrsou por finansiá pago di e salarionan na Refineria Isla. Segun por a komprondé for di su deklarashonnan, stakeholders, relashoná ku e refineria lo forma un grupo di proyekto pa yega na un solushon temporal. E problema grandi ta pa evitá ku e refineria ta stòp di drai. E gastunan envolví pa kuminsá di nobo lo ta inmenso i alabes peligroso.