Deklarashon di Gumbs kontra di Jamaloodin no tin balides

Segun dosente na universidat di Amsterdam dr. Mr. Bas de Wilde

1287
Punda—Dr. Mr. Bas de Wilde, kende ta dosente na Universidat di Amsterdam, e deklarashon nan di eks hefe di VDC kontra di Jorge Jamaloodin no tin balides i no por kondusí na kondena di e eks minister. Esaki e la duna di konosé den un rapòrt kual kontenido ta entrega den man di defensa di Jamaloodin, dr Rutsel Martha i mr. Eldon “Peppie” Sulvaran.

De Wilde ta wòrdu konsiderá komo e tòp eksperto na Hulanda den análisis di testigu durante prosedimentunan penal. E la skibi tambe e buki “Stille Getuigen” miéntras e ta laborá komo dosente prinsipal den Kódigo Penal na Universidat di Amsterdam. Segun de Wilde ta konkluí, Gumbs su deklarashon no tin un base di konfiabilidat i no por sostené den korte. E ta opiná ku e testigu anónimo di Gumbs no por funshoná komo tal, debí ku den Kódigo di Prosedimentu Penal di Kòrsou, un testigu por keda aseptá komo anónimo solamente si akaso e wòrdu menasa. Den e kaso di e testigu anónimo ku Gumbs ta papia di dje no tabatin menasa, aló ménos esei no a bini dilanti tampoko. Mas aleu el a bisa tambe, aparte di e parti tékniko, e testigu anónimo su deklarashon falta hopi detaye for di kual no tin sufisiente karga pa dirigí e kulpabilidat di Jorge konforme kontenido di e deklarashon di e testigu en kestion.

Por ehèmpel, De Wilde ta menshoná ku e testigu di Gumbs ta bisa ku hopi biaha Fonseca i Jamaloodin ta papia e ta den nan besindario, pero for di mesun deklarashon nan no por dedusí ta dikon e testigu kada biaha ta den e besindario di e dos hòmbernan. Ademas, segun e eksperto Ulandes, na momento ku e tabata presente unda Jamaloodin lo a duna e tarea pa asesiná Wiels, lo nan tabata papia asina duru ku hende den besindario por a skucha, pasobra ta esei e testigu mes a bisa a sosodé. Segun de Wilde, no ta probabel un hende tei duna órden pa asesiná un persona anto e ta papia asina duru pa mas hende skucha. E eksperto ta konkluí ku e deklarashon di Edsel Gumbs no ta unu konfiabel.