Temblor di magnitut 5,6 ta kousa alarma na Arequipa

75
Sitio unda e temblor aki a keda registrá.

LIMA – Un temblor di magnitut 5.6 grado a alarmá e poblashon di e siudat peruano di Arequipa, 1040 kilometer sùit di Lima. Esaki su episentro a keda registrá den laman, segun e Instituto Geofisiko di Perú.

E temblor a keda registrá na 47 minüt pasá di 8 ku episentro na 64 kilometer sùitost di e lokalidat di Lomas, na e provinsia di Caravelí, i na un profundidat di 17 kilometer.

Sinembargo, e presidente di e Instituto, Hernando Tavera, a splika ku e episentro tabata hopi leu for di zona di kosta, bastante serka na loke ta keda yamá Fosa Peruano Chileno.

Te ainda no a reportá daño personal ni tampoko material di parti outoridatnan munisipal òf regional.

E movementu aki a keda produsí algun ora despues di otro di magnitut 4 na e mesun provinsia di Caravelí, ku episentro na 41 kilometer sùitost di Chala, kua a keda registrá na 01.20.

Arequipa a registrá un seri di temblornan den e último dianan, ku magnitut mas abou, loke ku ta kombertí esaki den un di e regionnan ku mayor insidente di e tipo di aktividatnan aki.

E último temblor serio na Arequipa a keda produsí na aña 2001, na momentu ku un temblor di magnitut 8.4 a gòlpia e lokalidat di Ocoña na Camaná i a laga saldo di 74 morto i mas di 2.600 herido.