Hòmber buska pa intento di asesinato arestá

Den vehíkulo na altura di Landfill

4658
Willemstad— E tim di Mantenshon di Órden Públiko a realisá aresto di un hòmber ku tabata wòrdu buska pa un kaso di intento di asesinato i òf maltrato ku arma.

Ta trata di un kaso ku a tuma lugá na Banda Bou algun tempu pasa. E dia ei tabatin un diskushon ku a surgi entre di dos hòmber di e bario di Soto. Durante di e interkambio di palabra un di nan mester a saka un kuchú i a propiná e otro vários hinka ku e konsekuensha ku e tabatin ku wòrdu transportá pa Poli pa por haña asistensia médiko na unda despues e la keda interná.

For di e dia ei Polis no por a haña e sospechoso. A sigui ku e búskeda i tabata ayera e tim di Mantenshon di Órden Públiko a logra di para un vehíkulo riba e kaminda di Banda Bou pa ta mas eksakto na altura di landfill den kual e sospechoso tabata moviendo. Mesora e la keda arestá pa e kaso di intento di asesinato i òf maltrato ku arma. A bai warda kuné pa asina e wòrdu presentá dilanti un fiskal Ousiliar.