A denunsiá ku menor di edat hondureño ta keda utilisá komo eskudo

45
Menor di edat hondureño, kende aparentemente ta den estado di shòk.

CIUDAD DE MEXICO – Un menor di edat hondureño di entre seis i ocho aña di edat a keda bandoná i utilisá komo un eskudo pa drenta Estádos Unídos via di Texas, frontera di e pais ku México.

E menor di edat ta na un warda di polis di Texas, despues ku el a keda bandoná pa un hòmber ku a us’e pa drenta e pais norteamerikano.

Segun a keda indiká, outoridatnan di e pais a hasi un yamada na mayornan di e menor di edat pa identifiká nan mes i pa di e forma aki por identifiká e chikitin tambe pa por inisiá ku trámitenan korespondiente pa regresá esaki bèk pa Honduras.

Ademas a indiká ku e kònsùl di Honduras na McAllen, Texas, ta siguiendo e kaso ku plan di logra optené informashon relashoná ku identifikashon di e menor di edat, kende a keda usá pa un deskonosí komo un eskudo pa drenta Estádos Unídos.

E menor di edat mes aparentemente ta den estado di shòk, sin ke papia, debí na e troumanan ku el a sufri durante e kaminda, unda ademas di pasa den yen kos, e mester a krusa e kaminda ku un deskonosí i posteriormente a keda bandoná.

Entre luna di yanüari i inisio di luna di mei, outoridatnan a indiká ku a registrá un total di 7.157 menor di edat hondureño ku a keda mandá bèk pa nan pais. Di esaki nan 5.471 tabata biaha kompañá pa un famia.