Diputadonan venezolano ta denunsiá ku nan bibienda ta keda pintá ku menasa

49
Forma ku e bibienda i lugánan a manesé den oranan di ayera.

CARACAS – Miéntras ku Venezuela a selebrá e reapertura di e fronteranan ku entre otro Aruba i Brasil, diputadonan di e pais i dirigentenan di oposishon venezolano a denunsiá ku nan bibiendanan a manesé pintá ku mensahenan di menasa. Di esaki nan ta kulpa e gruponan iregular di gobièrnu di Nicolas Maduro.

Segun Juan Guaidó a indiká riba su kuenta personal di Twitter, e diktadura ta desesperá i ta sembra miedu ku terorismo na e estado. Esaki ademas a publiká foto di e bibiendanan di vários diputado pintá ku e mensahe, indikando ku ‘vamos por ti’.

For di oranan di djaweps último, legisladónan di manera Freddy Superlano i Luis Florida, akusá di ta involukrá den e intento di lanta militarnan kontra Maduro, a denunsiá ku su bibienda i esnan di su sernan kerí ta keda marká ku mensahenan ku nan ta konsiderá komo menasante.

Pero tabata den oranan di ayera, ku parlamentarionan manera entre otro Williams Davila, Maria Beatriz Martinez, Milagros Eulate i Jose Manuel Olivares, a sigurá ku nan bibienda i esnan di nan famianan, a manesé pintá.

E parlamentarionan aki a sigurá ku nan lo no laga niun hende intimidá nan pa e mensahenan aki i ku nan lo kontinuá ku nan lucha kontra e gobièrnu di Maduro riba kayanan di Venezuela.

Den e sentido aki, a bolbe indiká un yamada na konvokatoria di awe pa protestá kontra Maduro i pa defendé diputadonan ku a keda akusá pa hustisia di ta involukrá den e suseso militar den oranan di siman pasá, kua a keda liderá pa Juan Guaidó.

Venezuela ta pasando den un pik di tenshon polítiko for di luna di yanüari último. Esaki ta loke a provoká akshon di tantu Guaidó komo restu di e parlamentarionan di oposishon pa lanta kabes.