Patrick van Aanholt i Denzel Dumfries den preselekshon futbòl di Hulanda

254
Patrick van Aanholt.
HULANDA—E futbolista YDK Patrick van Aanholt, kende ta ku Crystal Palace den futbòl na Inglatera i tambe e arubano Denzel Dumfries, kende ta parti di e ekipo hulandes PSV, ta parti di e preselekshon di futbòl di Hulanda.

Esaki despues ku tékniko Ronald Koeman, a publiká su lista di 28 hungadó, den kuadro di preparashonnan pa weganan di Nations League, na yüni benidero.

Hulanda lo mira akshon na Portugal, enfrentando Inglatera, riba dia 6 yüni próksimo. Lo bira wega semifinal di Nations League, unda ku Suisa i Portugal mes tambe lo ta den lucha pe trata na alkansá e final. Dia 9 yüni, e ganadónan lo topa den e gran final, miéntras ku esnan ku pèrdè dia 6, lo lucha pa e terser puesto di e kompetensia.

Ámbos futbolista ta parti di e liña defensivo, unda van Aanholt ta hunga riba lateral robes i Dumfries riba ala drechi. For di e 28 hungadónan aki, Koeman lo anunsiá su 23 hungadónan komo parti di e selekshon definitivo, ku lo hasi e biahe.