Temblor di magnitut 5 ta sakudí Nicaragua

36
E temblor tabata di magnitut 5 riba skala di richter.

MANAGUA – Un temblor di magnitut 5 riba skala di richter a sakudí e kosta nikaragwense, sin ku a kousa víktimanan òf dañonan material na e poblashon.

E temblor aki a keda registrá na 11.23 i su episentro a keda lokalisá na 24 kilometer sùitost di Masachapa, na e munisipio di San Rafael del Sur, departamento di Managua. Esaki segun loke a keda detayá pa e Instituto Nikaragwense ku ta studia tipo di aktividatnan aki na e pais.

Segun un trahadó di e sentro aki, e movementu aki a tuma lugá na un profundidat di 39 kilometer i a splika ku esaki a keda kousá pa e choke di plakanan tektoniko Coco i Caribe.

Personanan di e pueblo di diferente munisipionan a reportá riba nan retnan sosial ku e temblor aki a keda sintí ku basta forsa, den algun kaso, na momentu ku algun persona tabata na nan sentronan di trabou.

Nicaragua a ehekutá un tèst di sunami na playanan di e pais dia 11 di aprel último, pa e poblashon sa kiko hasi ora ku e fenómenonan aki sorprendé nan durante Siman Santu tras di lomba.

E esenario di sunami tabata un di e tres situashonnan di emergensia ku outoridatnan a pone den práktika riba e dia aki. E otro dos nan tabata un temblor i un erupshon volkániko.