Aksidente di bùs na Chile ta laga seis morto i masoménos 30 persona heridá

58
Outopista unda e insidente a keda registrá.

SANTIAGO DE CHILE – Un total di seis persona a pèrdè nan bida i otro 30 mas a resultá heridá despues ku un bùs a bòltu na e parti sùit di Chile, den e region di Araucania.

E aksidente aki a keda produsí den oranan trempan di mainta na masoménos 600 kilometer sùit di Santiago, na e Ruta 5 Sùit, den un bùs regular di e kompania Pullman, kua tabata realisá e trayekto entre Santiago i Puerto Montt, 1000 kilometer sùit di e kapital.

Den e bùs tabatin un total di 53 pasahero. E vehíkulo aparentemente despues di a aksidentá a bai bòltu den direkshon kontrali di unda e tabata move.

Segun outoridatnan a indiká, e sirkunstansianan pa kua a pèrdè kontrol di e bùs, kua a bai bòltu di e otro banda di karetera, ainda ta keda investigá.

Lamentablemente e aksidente aki tabatin komo konsekuensia ku seis persona a pèrdè nan bida, ademas di e 30 nan ku a resultá heridá, mester ta gradesidu ku no ta nada di seriedat òf rísiko di fayesé.

E shofùr di e bùs mes a presentá heridanan leve i segun esaki mes a indiká, ta investigando si e insidente por tabata debí na un fayo mekániko.