Curaçao Vikings i Montaña Spartans ku triunfo den básketbòl

41
Basketbòl a sigui.
WILLEMSTAD—E kompetensia di básketbòl lokal, a kontinuá durante di e fin di siman ku ta tras di lomba, ku weganan ku a mira akshon den sala deportivo Errol Rooi na Sentro Deportivo Kòrsou.

Tabatin weganan hubenil i tambe kontinuashon di e seri di playoffnan inisial den kategoria Senior. Esaki unda ku tabatin 2 wega, ku entre otro Curaçao Vikings i Montaña Spartans logrando triunfo.

Curaçao Vikings, komo ekipo number 3, ta derotá Curaçao Trotters, ku tabata number 6, ku skor 73-60, pa asina gana e seri 2-0 i awó lo bai topa ku e ekipo number 2 ku ta Willemstad Warrios.

Bryan Perret-Gentil tabatin 18 punto pa e ekipo ganadó, miéntras ku pa e pèrdèdónan Jordan Josephina, a logra yuda su ekipo ku 19 punto.

Miéntras ku Montaña Spartans ta gana di Fortuna Brothers 80-70, pa asina empatá e seri entre ekiponan 4 i 5 na un triunfo pa banda, fòrsando e wega di deskite, pa asina yega na e ganadó ku lo bai topa Janwe Spartacus.

Pa Spartans, Wilkin Rosario tabatin 18 punto i pa Brothers tabata Yomil Ventura, ku tabatin 27 punto riba su nòmber.

Hubenil

Den kategoria U-10, Spartacus ta gana Sharks 28-15, ku Sebastian Perez, logrando 10 punto pa e ganadónan.

Den U-12 Spartacus ta gana di Sharks 37-20, ora ku Nick Maurera anotá 11 punto pa Spartacus i Ray Dee Verginie 12 pa Sharks.

Spartacus ta gana di Sharks 29-11 den U-14, despues ku pa Spartacus, Julian Vivas tabatin 14 punto i Jean-Pierre Pirela 12, pa Sharks.

Finalmente den kategoria U-16, tabata e ekipo di Sharks, ku ta gana di Spartacus 34-28, ku Jeadan Nieveld logrando 12 punto pa Sharks i Sahir Isei ku 12 pa Spartacus.