Ekiponan pa ‘Kaya 6’ den Promé divishon ta konosí

48
Bryan Scheidelaar, kende a anotá e uniko gol di Centro Barber.
WILLEMSTAD—E 6 ekiponan ku lo kompetí den playoff Kaya 6 di e promé divishon di futbòl FFK i segun nan posishonnan ta konosí. Esaki despues di e resultadonan di e weganan ku a mira akshon djasabra último den Stadion Ergilio Hato na Brievengat.

Primeramente den wega ku rèfri Arthur Gosepa a dirigí, tabata e ekipo di Centro Barber, ku ta gana Victory Boys ku skor mínimo i asina sigurá nan pase. Un ke otro despues di a pasa Inter/Willemstad na punto. E úniko gol di wega, a keda anotá na di 63 minüt di partido, pa Bryan Scheidelaar.

Den e segundo wega di anochi, tabata e orguyonan di bándabou Undeba, ku ta gana di e barika helnan di Kintjan, S.U.B.T., ku skor di 3-2. Esaki den wega ku no tabatin balides pa klasifikashon, pero si pa e posishon pa tèrminá, unda Undeba ta keda na di 4 puesto i S.U.B.T., na di penúltimo posishon riba e tabla.

Diangelo  De Aquino, Luchently Vrutaal i Shayrison Albertus a anotá pa Undeba, miéntras ku pa S.U.B.T. Trevor Martier i Romerson Winklaar tabata esnan ku a anotá, den wega ku Juniel ‘Araña’ Adelina a dirigí.

E ekipo barika hel, na 2 okashon tabata den bentaha, pero no ta logra mantené esaki i finalmente ta kai vensí.