Jean Julien Rojer i Horia Tecau kampion den ‘Madrid Open 2019’

46
E kampionnan di Madrid Open 2019.
SPAÑA—E Yu di Kòrsou kende ta tenista profeshonal, Jean Julien Rojer, huntu ku su duo e romano Horia Tecau a logra e titulo máksimo den e kompetensia internashonal di tènis, pa loke ta e kategoria dòbel na Spaña ayera.

Esaki ora ku nan a logra triunfo den e gran final di e konosido torneo pa tenistanan profeshonal ku ta hunga durante di e promé dianan di luna di mei, ku ta Madrid Open su edishon 2019.

Despues di un lucha for di durante di inisio di e siman ku ta tras di lomba, tabata ayera ku e duo formá pa tenistanan Rojer i Tecau a korona esaki, logrando e premio máksimo di e evento.

Ayera den e final nan a enfrentá i derotá e duo formá pa tenistanan Diego Schwartzman di Argentina i Dominic Thiem di Oustria, den wega ku a hunga riba kancha Manolo Santana, ku skor di 6-2, 6-3.