Perú ta ekspulsá otro 40 inmigrante venezolano

97
Na un promé instante a manda un grupo di 50 venezolano i awor otro grupo di 40.

LIMA – E Gobièrnu di Perú a ekspulsá un segundo grupo di 40 inmigrante venezolano ku antesedente penal, kua nan a ingresá i permanesé den e pais ku informashonnan falsu.

Segun a keda informá pa e Ministerio di Interior peruano, e venezolano, ku a keda mandá bèk den un operashon kordiná pa Forsa Aéreo Peruano, Outoridatnan polisial Nashonal, Migrashon i Polis di Caracas, a keda detené den oranan di siman pasá mardugá. Esaki na e kapital peruano i tambe den e region di Callao, durante di un operashon polisial.

Ta trata aki di e segundo grupo di inmigrantenan venezolano ekspulsá pa e gobièrnu di Perú for di dia ku e pais a kombertí su mes den e segundo region ku mayor kantidat di venezolano, despues di Colombia.

Un operashon similar a keda realisá na luna di aprel tras di lomba, na momentu ku e Ministerio di Interior peruano a ekspulsá un total di 50 inmigrante venezolano ku antesedentenan penal, kua nan a drenta e pais tambe ku informashon falsifiká pa asina por skonde nan antesedentenan kriminal.

Entre e delitunan ku e detenidonan a kometé, tantu hende muhé komo hende hòmber di diferente edat, tin ladronisia grave, komersio di tráfiko di droga, ladronisia di vehíkulo, violensia òf resistensia na outoridatnan i tambe delitu kontra bida, kurpa i salú.

E medida ku e gobièrnu ta realisá ta den un konteksto di persepshon negativo di inmigrashon venezolano na Perú, kua a subi ku 43 porshento na luna di febrüari di aña pasá i ku un 67 porshento na luna aprel último. Esaki ademas debí na un subida di delinkuensia i redukshon di lugánan di trabou pa peruanonan mes.

Debí na e krísis polítiko i humanitario na Venezuela, mas di 730 mil venezolano a kue direkshon Perú den e último tres añanan, sifra ku lo sigui oumentá den e próksimo lunanan.

Perú ta e segundo pais ku a risibí mas venezolano, despues di Colombia, kua a risibí un total di 1.300.000 venezolano.