Piesa nobo di Clinton Hato ku HYPE

145
“Kisas ba lubidá” ta su piesa nobo, ku pronto lo bai ta riba merkado.

WILLEMSTAD,—-E kantante di aña 2018 Clinton Hato a drenta den studio di grabashon pa ku su piesa nobo, huntu ku su agrupashon musikal GET HYPE. Titulo di su piesa ta “kisas bo lubidá”, ta trata aki di su mes un komposishon miéntras ku e areglo ta den man di Catan Carolina.

Mester bisa ku esaki ta e mes un tim ku a traha riba e piesa di aña 2018 ku ta e komposishon “Kon a bai”. No ta un sekreto ku e agrupashon musikal GET HYPE a pèrdè algun miembro, pero esaki no ta strobando e otro músiko nan di move ku nan banda.

Di informashon ku ‘E Mulina’, ta disponé di dje ta bisa ku, awor mas ku nunka e banda a hala mara mas duru ku rabu di makaku. Nos a komprendé ku gerente di e banda tin plan nan grandi pa e di dos parti di aña 2019, pues HYPE ta mas fuerte ku nunka.

‘E Mulina’, tin informashon ku promé ku luna di mei yama ayó e piesa nobo di Clinton Hato ta bai kuminsá zona na diferente radio emisora nan lokal. Nos tin informashon ku e piesa nobo di Clinton ta hopi pero hopi riku na letra, nos a komprendé ku e piesa nobo di Clinton Hato tin tur kos pa bira otro hit grandi pa e kantante ariba menshoná.