Dama a maltratá víktima ku a insultá su yu

353
WILLEMSTAD,—- Korte a trata un kaso unda un dama lo mester a maltratá su víktima, despues ku e víktima lo mester a insultá su yu miéntras tambe a insultá e sospechoso despues di esaki.

Ta trata aki di un kaso ku a tuma lugá for di aña 2017 unda mester tabatin diskushon na un skol, despues ku e víktima den e kaso lo mester a insultá yu di e sospechoso. Tabata 3 di yüli di aña 2017 ku e sospechoso lo mester a maltratá e víktima na un skol, despues di e insulto.

Segun e dama e sospechoso ku e víktima lo mester a uza un palabra basta bulgar kontra di su yu chikí i ku despues a insult’é tambe. El a splika wes ku e la bai pa puntra e dama dikon el a insultá su yu, unda e dama a bisé ku esaki no ta kuadra ku realidat i despues a insultá e tambe. El a splika ku ta na e momentu aki ku el a dal e dama na altura di su kara.

E sospechoso a splika ku e no ta haña hustu ku tin 3 akusashon kontra di dje i ku úniko echo ku e ta atmití ta e maltrato. El a trese dilanti ku e no kibra e brel di e víktima i tampoko a menas’é. Segun e dama ku esaki ta falsu testimonio .E víktima a deklará ku e mester a bai paga 700 florin pa bai drecha su brel despues ku esaki a kibra na man di e sospechoso.

M.H. kende ta e sospechoso a bisa ku e brel di e dama no a bai riba e dia en kuestion i ku esaki a djis lèn na momentu ku el a dal e. Tambe el a trese dilanti ku e tin testigu ku lo por deklará esaki. El a presentá ku su frei kual el a deklará ku M.H. no a kibra nada na kurpa di e víktima. Segun frei di e sospechoso ku e víktima lo mester a menasá e, ku no tin nada di aber ku esaki.

A bin dilanti den e kaso ku e sospechoso M.H. lo mester a bisa víktima ku si e pasa den su kaminda lo e trap’é ku e outo. E sospechoso ta desmentí esaki unda el a bisa ku ta e víktima ta esun ku ta intimid’é. Segun e sospechoso ku e no ta molestiá e víktima i tampoko ta dirigí palabra na dje. E sospechoso a trese dilanti ku e víktima lo mester a mir’é despues di e insidente unda a saka dede mei mei pe.

Fiskal na su turno a bisa ku no tin prueba ku el a menasá e víktima i tampoko ku el a kibra brel di e víktima riba e dia en kuestion. El a bisa ku pa e motibu aki e no por pidi un kastigu ku peso, mirando ku ta e úniko echo ku tin kontra di e dama ta e akusashon di e maltrato, ku el a asta atmití. El a pidi 30 ora di trabou pa e sospechoso pero kondishonal ku tempu di tempu di 3 aña.

Tin ku añadí ku e sospechoso no tabatin un abogado pa sali na su defensa i el a disidí di defendé su mes. Wes mr. de Kort a baha e tempu di prueba di e sospechoso, unda el a konden’é na 30 ora di trabou pero ku 2 aña di prueba. A buta e dama na altura ku si e no ta di akuerdo ku e sentensia e tin 2 siman pa apelá esaki.