E Rais di Sablika a habri inskripshon pa Seú 2020

64
Ya su mente ta riba 2020.

WILLEMSTAD,—-E Rais di Sablika kier kuminsá na yama danki na tur hende ku di un manera òf otro manera a hasi posibel pa E Famia di Sablika por a desfilá den e Parada di Seú di parti pabou di Brùg i esun na Banda Bou 2019.

Nos tur sa ku nos pais no ta pasando den e mihó tempunan ekonómiko, pero nos a logra pa pone manera semper algu bunita un biaha mas den kayanan di Kòrsou. Un danki na nos miembronan, danki na e públiko ku a sostené nos durante di e parada nan.

Un danki na Grupo Rítmiko Sablika ku selebrando 10 aña den farándula kultural a deleitá nos tur ku nan músika i bon ambiente. I na tur Prensa ku e sosten pa ku E Rais di Sablika i Grupo Rítmiko Sablika. Tambe ‘E Mulina’, a haña informashon ku e chèns ta hopi grandi ku otro aña Sablika lo partisipá den festival di Tumba.

Pa tur e petishonnan ku ta drenta nos a habri Inskripshon Seú 2020 pa asina esnan ku kier forma parti di E Famia di Sablika. Otro aña nos ta selebrá 9 aña den Seú. Por tuma kontakto ku Sonalie Rollins na telefon, +599 9 515 6358, kaminda por haña tur informashon.