Gaviria nombrá ganadó di e di tres etapa di Giro d’Italia

50
Fernando Gaviria nombrá ganadó di e di tres etapa di Giro d’Italia.
ITALIA – Tabata durante di e di tres etapa di e Giro d’Italia ku a ranka sali na Vinnci i a finalisá na Orbetello (un distansia di 220 kilometer) ku e siklista kolombiano Fernando Gaviria a keda nombra komo ganadó di e di tres etapa di e Giro d’Italia.

Fernando Gaviria no a hasi masha fanfara na momentu di tuma su premio riba a e podio di honor. “Pa ami ta Viviani a gana”, asina e siklista kolombiano a komentá, relashoná ku su kolega italiano Elia Viviani, kende nèt despues di e kareda a keda deskalifika.  “Mi ta lamentá e loke ku a sosodé kuné, e ta un bon amigu. Segun ami e la realisá un tremendo sprent den e parti final, pero aparentemente e hurado a mira esaki diferente.”

Momentu ku Elia Viviani ta krusa dilanti su oponente.

Segun e hurado ta asina ku Viviani lo a sali for di den su liña di sprent i opstakulisá e kareda di otro siklista. Tabata na final di aña pasá ku e siklista kolombiano Gaviria a bandoná e ekipo di Quick-Step unda pa algun aña e tabata kompañero di ekipo di Elia Viviani. “Elia ta bon, i e lo bai gana algun etapa mas durante di e evento aki”, asina e sprenter di Team Emirates a ekspresá den un forma di konsuelo na su eks kompañero.

E viktoria aki ta e di sinku ku Gaviria ta registrá den su partisipashon na e Giro d’Italia, tur e kuater interiornan a tuma lugá na 2017. “Mi ta kla pa e siguiente etapa”, asina e la komentá, hasiendo algu di wega basá riba e etapanan largu ku ta sigui. Sigur durante e dianan siguiente aki nan lo bai kompetí riba algun ruta ku ta mas largu ku 230 kilometer. “Bo ta yega hotèl lat, i bo ta bai drumi lat. Lo mi tabatin deseo di por drumi mas, pero ta tur hende tin e mesun problema.”

Primoz Roglic di Slovenia ta komandá e tabla general i awe djamars nan lo sali na Orbetello i lo finalisá na Frascati rekoriendo un ruta di 235 kilometer.