Manchester City lo por keda for di e próksimo Champions League

123
Manchester City lo por keda for di e próksimo Champions League.
MANCHESTER – Apénas un dia despues di a selebrá e konkista di e título maksimo den Premier League, e ekipo di Manchester City ta tema di dia atrobe, pero na e okashon aki di un forma muchu mas desagradabel pa loke ta e interesnan di e ekipo dirigí pa Pep Guardiola.

Segun ‘The New York Times’, e ekipo ‘citizen’ lo por keda ekskluí for di e próksimo Champions League, dependiendo di e rekomendashonnan di e investigadónan di UEFA, pa supuesto iregularidatnan  finansiero kometé.

E ‘financial control board’ di UEFA lo a reuní na Nyon (Suisa) dos siman pasá, konkluyendo ku lo a eksistí engaño na e reguladornan finansiero, un echo ku lo a proboká e posibel rekomendashon di laga e aktual kampion ingles for di e próksimo edishon di e kompetensia kontinental.

Ta  teme ku e reputashon di e organismo ku ta rigi e futbòl oropeo lo por keda tachá si tur loke ku a keda investigá no trese konsekuensia kuné pa e ekipo di Manchester City, segun e informashon publiká pa e medio di komunikashon merikano.

Tur kos ta indiká ku ta trata di un straf di un aña entorno e torneo di Champions Legaue, pero no ta konosí ku esaki ta pa e temporada 2019/2020 of pa e temporada 2020/2021.

Algun luna pasá ya a keda publiká ku tantu e ekipo di PSG komo Manchster City lo a faya ku e regla di Fair Play finansiero, pero e tempu ei e ekipo a emití un komunikado i a tilda e akusashonnan aki komo akusashonnan falsu. Segun New York Times, tur kos ta den man di Yves Laterme, líder di e investigashon menshoná i eks promé minister di Bèlgika, ku lo tin e último palabra.