Marelly Balentina ku diferente logro i rèkòrt den atletismo komo studiante na Merka

173
Marelly Balentina.
WILLEMSTAD—E atleta YDK ku ta studiando na Merka i ta miembro di e ekipo di atletismo lokal Trupial/AutoCity ku ta selebrando 30 aña di eksistensia, Marelly Balentina, ta bai disfrutá di un vakashon bon meresí próksimamente.

Esaki despues di un aña eksitoso dediká na su estudio i alabes deporte, unda e ta regresá Kòrsou otro siman ku poder di Dios, ku 3 medaya i tambe 3 título ku el a risibí durante e aña eskolar deportivo ku ta tras di lomba.
Su premionan ku e la logra na optené ta :
1. Medaya di Plata na “Indoor National Championship” den pushamentu di ala di heru.
2. Medaya di Bròns na “Outdoor National Championship” den lansamentu di disko.
3. Medaya di Oro na “Outdoor National Championship” den lansamentu di sper.
4. E premio di “Female MVP Track & Field Athlete 2019”.
5. “Atleta di aña 2019”.
6. Rekonosementu akadémiko pa un GPA di 3.0 òf mas.
Ademas Marelly a marka pouta ku 5 rèkòrt nobo establesé na e Universidat kaminda e ta studiando, ku ta ‘Regent University’ na Virginia Beach, VA.
E rekòrtnan ku e la pone, ta riba e disiplinanan di:
1. Lansamentu di sper 600g
2. Lansamentu di disko 1k
3. Pusha bala di heru 4k (indoor+outdoor)
4. Weight throw 20lb
5. Hammer throw 4k
E último 2 disiplinanan ta kompletamente nobo den Marelly su karera deportivo i ta apénas un par di luna e tin ta praktiká esakinan, unda nan no ta konosí na Kòrsou.
Marelly su historia deportivo a kuminsá na aña 2012 na momentu ku el a partisipá pa promé biaha na weganan deportivo Interinsular di e tempu ei i titulá su mes komo kampion “overall”. Despues di esei el a forma parti di e ekipo di atletismo Trupial/Autocity i a partisipá na vários kompetensia tantu lokal komo riba nivel internashonal, manera entre otro Carifta Games, ODUCC Games i tambe NACAC.

Ta netamente e karera deportivo eksitoso aki, kombiná ku un estudio bon na nivel, a habri porta ku Marelly a risibí un “scholarship” pa kual e ta studiando “Criminal Justice” na Merka.

Keda inspirá awe pa un hóben di apénas 22 aña di edat, kende ketu bai ta mantené bandera di Kòrsou na laira dunando e mihó di dje den kada kompetensia, pero tambe manteniendo su nivel di estudio na haltu.

Deporte Vigilante tambe ta uni na e palabranan di felisitashon pa Marelly Balentina.