Scherpenheuvel ku skor mínimo riba Centro Dominguitu

133
Akshon durante di e wega.
WILLEMSTAD—E 2 buèltanan di e kampionato regular di futbòl FFK den promé divishon, a yega su fin ayera. Esaki na momentu ku e dos ekiponan mas ariba di e tabla di posishon a enfrentá otro.

Tabata wega ku a hunga den Stadion Ergilio Hato, unda Scherpenheuvel a topa ku Centro Dominguitu. E wega aki a keda dirigí pa rèfri Edsel Dimie, i a inisiá basta lat for di orario programá pa e inisio, debí ku koriente a kai afó den bario di Brievengat i bini nèt algu promé ku 8’or. Finalmente e ekiponan a topa otro i despues di a lucha durante di e promé 45 minütnan sin por a anotá, tabata den e parti komplementario ku Christopher ‘Papa’ Isenia, ta probechá riba un fayo den defensa di Dominguitu pa avansá i topa kara kara ku Gino Costina, pa asina anotá e úniko gol di wega. Centro Dominguitu ayera a hunga ku entre otro Ashar Bernardus i Ivanny Calvenhoven na  banki, unda ámbos a drenta durante di e último minütnan di e wega. Scherpenheuvel ta logra e promé puesto ku 41 punto, lagando Dominguitu nan tras ku 35.