Selekshon Boneiru den torneo ‘futbòl playa’ na Mexico

146
E selekshon di Boneiru.
MEXICO—E selekshon di nos hermana isla Boneiru ku ta hunga futbòl playa, òf tambe Beachfootball òf zandvoetbal, ku ta e futbòl ku ta wòrdu hungá den santu, ta den kompetensia na Mexico. Esaki despues di a biaha durante di e fin di siman ku ta tras di lomba.

Boneiru ta un di e 16 ekiponan ku lo kompetí den e di 8 torneo di Concacaf, ku ta wòrdu repartí den 4 grupo di kada unu 4 ekipo, kual alabes ta konta pa weganan klasifikatorio pa e kampionato mundial di futbòl playa.

E 2 ekiponan ku alkansá e partido final di e evento ku tin komo sede Puerto Vallarta, lo logra nan klasifikashon pa e kampionato mundial futbòl playa FIFA 2019, ku mester tuma lugá na Paraguay.

Despues di e promé buèlta unda tur ekiponan di grupo lo topa otro, e promé dosnan di kada grupo lo klasifiká pa siguiente buèlta, unda lo hunga dal saka den kuartfinal, semifinal i final.

E delegashon di Boneiru ku ta na Mexico ta konta ku Winston ‘Juni’ Gill komo teammanager, unda Hubert ‘Zeil’ Cicilia ta e tékniko i ta konta ku futbolistanan miembro di Federashon Futbòl Boneiru, unda Giandro ‘Gigo’ Steba, kende den pasado a hunga na Kòrsou ku Centro Dominguitu, ta parti di e ekipo.

E weganan di e promé buèlta, ku ekiponan enfrenatndo otro den grupo, lo hunga di djaluna 13 te ku djaweps 16 mei próksimo. Djabièrnè awó dia 17 lo tin weganan di kuartfinal, djasabra dia 18 weganan di semifinal, pa asina hunga e gran final djadumingu dia 19 mei benidero.

E ekipo for di Boneiru, ta parti di Grupo C i ta kompartí grupo ku e selekshonnan di Merka, Bahamas i Antigua.

Grupo A ta konta ku ekiponan di Mexico, Costa Rica, Jamaica i Guatemala. Grupo B tin Panamá, Trinidad & Tobago, Turks & Caicos i Virgin Island. Miéntras ku grupo D ta konta ku El Salvador, Guadaloupe, Belize i tambe Guyana.

Tabata ayera riba e promé fecha ku Boneiru a enfrentá Merka i a kai vensi ku skor di 14-1 i mañan lo topa Bahamas.

Ta trata aki di deporte ku tabata basta gustá i ku tambe a lanta kabes riba nos isla algun aña pasá, pero seguidamente no a sigui ku esaki mas.