Venezolanonan indokementá lo keda será pendiente solushon

597
WILLEMSTAD,— Despues ku 33 venezolano a entamá kaso kontra gobièrnu pa inhustisia ku lo mester tin kontra di nan, wes a disidí kontrali na e petishon ku nan a hasi. Ta trata aki di 33 for di 40 venezolanonan ku tabata será den barak, kual algun ya a hui.

Tabata un kaso basta intenso unda e venezolano a trese dilanti ku ta trata nan hopi malu i ku no ta duna sufisiente kos pa uza durante nan detenshon. Tambe a bin dilanti ku mester a sera nan den un espasio ku 20 hende por hospedá, unda nan tabata un total di 40 venezolano den e espasio aki. Loke sigur a hala atenshon ta e echo ku nan a bisa ku no ta laga nan distraí sufisiente.

Nan a trese dilanti ku e persona nan ku ta será pa kometé diferente echo kastigabel ta distraí for di 9or di mainta te ku 5or di atardi miéntras nan ta distraí entre 12or pa 2or di mèrdia. E venezolanonan tabata ke pa duna nan libertat pendiente e pa e solushon ku Minister lo mester a bin kuné pa deportá nan pa nan pais. Mirando e situashon ku tin aktualmente Minister Girigorie a bisa ku esaki ta difísil i a trese dilanti ku e intenshon tabata pa charter un avion, pa asina transportá e ilegalnan pa nan pais.

Abogadonan di e venezolanonan  pleita pa nan pa asina trata na konvensé wes pa nan haña nan libertat te dia un trese un solushon pa e situashon. Tambe a trese algun persona ku ta dispuesto na tuma e venezolanonan aki pa  nan biba i traha aki na Kòrsou. Di otro banda abogadonan di gobièrnu a bisa ku esaki por ta devastador pa nos ekonomia, mirando ku nos pais mes tin hopi persona ku mester di trabou.

Wes mr. Martinez a tuma desishon den e kaso aki, despues ku el a bai asta na prizòn pa wak e situashon. El a bisa ku e no ta bai di akuerdo ku e petishon di e venezolanonan i ku nan mester keda detené pendiente pa e solushon ku lo mester ta na kaminda den luna di mei aki. Gobièrnu a pidi te ku 23 di mei próksimo pa nan por buska un solushon pa ku e situashon.