Eloy Room su promé opshon ta pa den eksterior

634
Eloy Room.
HULANDA—E kiper di nos selekshon nashonal di futbòl, Eloy Room, no ta sperando riba un transferensia unda lo e por pasa pa PEC di Zwolle òf VVV di Venlo. Esaki segun su representante a duna di konosé indikando ku e kiper lo ta deseá pa yega na un akuerdo pa bai hunga den eksterior. Esaki despues ku e rumor ku PEC a mustra interes den su persona a plama.

Eloy Room di 30 aña di edat, ta finalisá su kontrato na final di temporada, unda te ainda no tin ningun ekipo grandi hulandes konkreto pa e kiper.

E ekiponan manera PEC i VVV sigur no ta un opshon i ta tratando na keda kla ku algu den eksterior, ounke ku lo e por hasi un eksepshon pa Vitesse, ku tabata pa hopi aña su tim, miéntras ku tambe e ta biba den serkania. E organisashon aki, tambe lo por paga su salario. Tabata na aña 2017 ku Room a pasa di Vitesse pa PSV, unda te ku awe e ta suplente di Jeroen Zoet.