Peter de Vries ta sigui traha apesar di menasa

151
reportero hudisial De Vries riba lista di morto di kriminal Taghi
AMSTERDAM—Reportero hudisial Peter R de Vries ta keda na televishon RTL Boulevard apesar di menasanan di morto.

Anteriormente a bira konosí ku Peter R ta riba lista di morto di e kriminal fugitivo Ridouan Taghi. E ta kontentu ku RTL no ta spanta pa menasa, segun De Vries. Su kolega John van den Heuvel no por a sigui ku su programa despues ku el a haña menasa di morto. Debí na menasa di un atentado e no por a drenta e studio na Leidseplein. Esaki tabata un desishon konhunto di burgemeester Halsema, fiskal i hefe polisial. De Vries no sa dikon e ta riba lista di morto di Taghi. E ta sospecha algun deklarashonnan ku el a hasi tokante Taghi i su banda. E ta boga pa kastigu di bida largu pa kriminalnan manera Taghi. Minister di Hustisia Grapperhaus ta lamentá e kaso kaminda reporteronan ku kurashi ta keda obligá di biba bou di seguridat. E no kier a duna mas informashon di e menasa. Segun e minister mester hasi mas pa kombatí e tipo di menasanan aki. Baho mundu mas i mas ta usa e praktika aki. Taghi ta e kriminal mas buska na Hulanda pa gran kantidat di likidashonnan.