Dos réplika di magnitut 4 i 5.1 registrá despues di temblor di 5.9

51
Sitio unda e temblor a keda registrá i a kousa alarma na e pais.

SAN SALVADOR – Dos temblor di magnitut 4 i 5.1 riba skala di richter, ku episentro na kosta Pasífiko, a sakudí El Salvador despues di un fuerte temblor di magnitut 5,9 ku a keda sintí tambe na parti di Honduras i Nicaragua. Esaki a kousa alarma entre e poblashon.

E Ministerio di Medio Ambiente i Rekurso Natural a informá ku e temblor mas resien, di magnitut 4, a keda registrá na 10:51 i tabatin un profundidat di 63.9 kilometer i a keda lokalisá dilanti kosta di e departamento di La Union.

Na El Salvador, outoridatnan di yudansa a yama e poblashon pa mantené kalma i tuma medidanan di prekoushon nesesario pa asina evitá insidentenan i a pidi pa no generá rumornan ku por alarmá e siudadanonan.

E Direkshon General di Protekshon Sivil a informá ku te ainda, segun ta keda monitor e situashon, no tin reporte di daño ni tampoko víktimanan i a indiká ku tur e personal di e institushon ta mantené nan mes konstantemente bibu pa kualke situashon.