Un morto registrá despues ku bùs a bòltu den intento di atrako na México

64
Forma ku e bùs a keda despues di bòltu.

CIUDAD DE MEXICO – Un persona a pèrdè su bida i otro 16 mas a resultá heridá na momentu ku un bùs di pasahero a bòltu durante un intento di atrako na e estado mehikano di Tamaulipas.

Segun un di e pasaheronan di e bùs, ya nan a keda ataká, pues a kibra glas di e bentana patras di e trùk i tambe a manda nan ku algun baranka di piedra. Apesar di tur esaki e shofùr a disidí di no stòp e vehíkulo.

Segun outoridatnan, e insidente a keda registrá den e mardugá di djárason tras di lomba, unda dos bùs di pasahero ku tabata biaha riba e karetera Ciudad Victoria-Matamoros.

Un trùk ku vários persona a buska moda di sera e vehíkulo pa asina esaki nan keda obligá di kue brek, e promé aparentemente a logra sigui sin problema i a alegá su mes for di e sitio, pero e segundo a hañ’é fòrsá di kue brek pero debí na peso i velosidat a kousa ku e bùs a bòltu riba su banda drechi.

Un muhé di aproksimadamente 40 aña di edat ta esun ku a pèrdè su bida den e aksidente i otro 16 pasahero mas a resultá heridá, kuater di nan konsiderá di gravedat.

Den e bùs aksidentá, di e empresa transportadó ADO, tabatin un total di 43 persona biahando i esaki a sali for di e siudat di Martinez de la Torre, estado mehikano di Veracruz, ku su destino final pa Reynosa.

E promé bùs ku a invadí e intento di ladronisia, a bolbe bèk riba kaminda debí ku e no tabatin informashon i na su yegada tabata kende a bringa apoyo na e pasaheronan heridá, mientras ku e supuesto atrakadónan a hui for di e sitio.

Na e sitio a presentá e personal di Marina, outoridatnan Federal Preventivo, di Protekshon Sivil Estatal i Krus Kòrá, kende nan a trasladá esnan heridá pa klínika di Soto la Marina.

Un chikitin di dos aña di edat ku tabata biaha ku e pasahero ku a pèrdè su bida a keda reportá den bon kondishon di salú.

Na e karetera aki a registrá den e último simannan un total di 287 migrante sentroamerikano ku ta biaha den kahanan, den trùk di karga, ruta pa krusa di nort pa sùit di Tamaulipas.

Na e estado, dia 7 di mart último un total di 19 pasahero, ku ta suponé di ta migrantenan, a keda sekuestrá na momentu ku nan tabata biaha den un bùs ku ta kubri e ruta di Tampico pa Reynosa, na e frontera ku Estádos Unídos.